រង់ចាំយ៉ាងអន្ទះសា នាយ ពែកមី បានជួបមុខកូនប្រុសហើយ !

កាលពីម្សិលមិញតារាកំប្លែង នាយ ពែកមី បានប្រកាសពីថ្ងៃកំណត់ដែលត្រូវសម្រាលកូនក្នុងផ្ទៃរបស់ភរិយាថានឹងត្រូវទទួលការវះកាត់នៅព្រឹកថ្ងៃទី ០៩ ខែ មីនា ឆ្នាំ ២០១៧ នេះ រួមជាមួយការបន់ស្រន់សូមឱ្យភរិយា និង កូនទទួលបានក្តីសុខផងដែរ ។

ជាការពិត នៅព្រឹកមិញនេះ នាយ ពែកមី ក៏បានជូនភរិយាទៅសម្រាលកូនក្នុងផ្ទៃដោយវះកាត់ពិតមែន ហើយថែមទាំងបង្ហើរនូវក្ដីបារម្ភយ៉ាងខ្លាំងខណៈគ្រូពេទ្យតម្រូវឱ្យមានអ្នកត្រៀមសម្រាប់ផ្ដល់ឈាមដល់ទៅពីរនាក់ឯណោះ ។

ទីបំផុតនៅមុននេះបន្តិចភរិយាតារាកំប្លែងរូបនេះ បានសម្រាលកូនប្រុសនោះប្រកបដោយសុវត្ថិភាពហើយនៅថ្ងៃទី ០៩ ខែ មីនា ឆ្នាំ ២០១៧ នេះ បន្ទាប់ពីទទួលបានការវះកាត់ដោយភាពជោគជ័យ ។

ជាការពិត ក្រោយពីការវះកាត់ប្រកបដោយជោគជ័យ និង ប្រកបដោយសុវត្ថិភាពទាំងម្ដាយទាំងកូនរួចមក នាយ ពែកមី ក៏បានបង្ហាញអារម្មណ៍រំភើបសប្បាយរីករាយ និង ត្រេកអរយ៉ាងខ្លាំងខណៈទទួលបានចំណងដៃកូនប្រុសម្នាក់ទៀតពីភរិយាជាទីស្រឡាញ់ ។ ក្នុងនោះដែរក៏មានទស្សនិកជនជាច្រើនបានចូលរួមអបអរសាទរដល់សមាជិកថ្មីរបស់គ្រួសារនាយ ពែកមី ផងដែរ ៕