ប្រជាជននៅអរិយក្សត្ររំភើបចិត្តខ្លាំង ពេលឮគម្រោងសង់ស្ពានភ្ជាប់ទៅក្ដីតាកុយ
ប្រមុខរាជរដ្ឋាភិបាលទើបបានប្រកាសថ្មីៗពីគម្រោង
ក្នុងការសាងសង់ស្ពានពីរបន្ថែមទៀតគឺពីជ្រោយចង្វា ទៅស្វាយជ្រំ
និង មួយទៀតពីអរិយក្សត្រទៅក្ដីតាកុយ។
ដំណឹងមួយនេះបានធ្វើឲ្យប្រជាជនដែលរស់នៅ និង
ធ្វើដំណើរនៅតំបន់អរិយក្សត្រមានអារម្មណ៍រំភើបជាខ្លាំង។
ជាក់ស្ដែង លោក សែម មករា
ដែលជាជាងសំណង់មួយរូបនៅទីក្រុងរណបកោះពេជ្រ និង
មានទីលំនៅនៅម្ដុំអរិយក្សត្របានសំដែងក្ដីរំភើបយ៉ាងខ្លាំង
នៅពេលលឺថា
រដ្ឋាភិបាលគ្រោងនឹងសាងសង់ស្ពានមួយពីអរិយក្សត្រទៅក្ដីតាកុយ។
លោកបានបញ្ជាក់ថាវានឹងបង្កលក្ខណៈងាយស្រួល ទៅមកឆាប់រហ័ស និង
មានសុវត្ថិភាពចំពោះប្រជាជនដែលឆ្លងទៅ
ឆ្លងមកដើម្បីចូលក្រុងភ្នំពេញទៀតផង។
ចំណែកលោក រស់ សារ៉ុម
ដែលមានមុខរបររត់ម៉ូតូឌុបនៅអរិយក្សត្រវិញបានអោយដឹងថា
លោកត្រូវដឹកម៉ូយឆ្លងសាឡាងមិនតិចជាង១០ជើងនោះទេក្នុងមួយថ្ងៃ
ដូចនេះប្រសិនបើមានស្ពានមួយឆ្លងកាត់ជំនួសវិញ
នោះគឺនឹងជួយកាត់បន្ថយការចំណាយរបស់លោកបានច្រើនជាក់ជាមិនខាន។
ជាពិសេសគឺចង់ធ្វើដំណើរទៅណាមកណា
នឹងបានរហ័សទាន់ចិត្ត។
មិនខុសគ្នាប៉ុន្មានដែរ អ្នកមីងស្រីតូច
ដែលជាអាជីវករលក់មាន់អាំងនៅអរិយក្សត្រផងដែរនោះ
មានចិត្តរីករាយយ៉ាងខ្លាំងប្រសិនបើរដ្ឋាភិបាលសាងសង់ស្ពាននៅទីនោះ។
អ្នកស្រីបន្តថា
កាលណាមានស្ពានគឺនឹងមានភាពងាយស្រួលក្នុងការចុះឡើងចូលក្រុងភ្នំពេញ
ពិសេសពេលឈឺថ្កាត់យប់ព្រលប់ជាដើម។ មិនតែប៉ុណ្ណោះ
វាក៏នឹងមានភ្ញៀវធ្វើដំណើរអ៊ូអរជាងមុនផងដែរ
ដែលនាំអោយការរកស៊ីរបស់អ្នកស្រីអាចលក់ដាច់ជាងមុនទៀតផង។